بحبك اوي يامامتي ♡

ماما يا حبيبتي، بجد ساعات وسط سحلة الأيام والضغط والدراسة وكل اللخبطة والسرعة اللي الواحد عايش فيها دي، بفتكر إن وجودك هو الحاجة الوحيدة الحقيقية والمضمونة في حياتي كلها. أنا عارفة ومستوعبة كويس إني مش طول الوقت بعرف أعبر عن اللي جوايا، وممكن أكون في أوقات كتير بنشف دماغي وبقاوح وبقلب دماغي في حاجات تافهة وبقعد أجادل معاكي في التليفون لمجرد العناد. وأكيد ساعات بكون متعبة جداً أو بزهق بسرعة من أقل حاجة وبطلع ضغط يومي عليكي في المكالمات، بس بجد وربنا يعلم، مفيش حد في الدنيا دي كلها بيريحني ويفهمني وبيهديني زيك أبداً. وانك دايما اول حد ييجي على بالي في اي حاجه تحصلي ,ببقى دايما عايزه احكيلك انتي ومستعجله اكلمك واخد رايك دايما. ولا فيه حد في الكون ده كله بيعرف يمتص غضبي أو يفهمني من مجرد نبرة صوتي في المكالمة من غير ما أشرح كتير زي ما بتعملي معايا دايماً وبمنتهى البساطة. الفكرة مش بس إنك أمي اللي بتخاف عليا، الفكرة إنك الشخص الوحيد اللي أنا بكون معاه على طبيعتي بنسبة مية في المية من غير أي تجميل أو تظبيط للكلام. أنا لما بتكلم معاكي بقلع كل الأقنعة اللي بقابل بيها الناس وببقى براحتي تماماً، ومن غير ما أشيل هم كلمة بقولها أو أظبط كلامي عشان خايفة تتفهم غلط أو حد يحكم عليا. بتبسط بجد أوي بالمكالمات العادية والمفاجئة بتاعتنا، بالدردشة والفضفضة في أي كلام ملوش لزمة لمجرد إننا بنسمع صوت بعض، وبحنيتك وطول بالك عليا اللي مفيش زيهم في العالم. أنتِ بجد أكتر حد بيفرفشني ويفك عني لما الدنيا تقفل في وشي، ومجرد سماع صوتك لوحده فيه كمية طاقة إيجابية وهزار بيمسحوا أي نكد أو زعل مريت بيه طول اليوم برة. بجد شكراً على كل مرة سكتي فيها واستحملتيني وأنا عصبية ومش شايفة قدامي، وشكراً على تفهمك لتقلباتي ومودي اللي بيتغير في ثانية من غير سبب واضح في وسط كلامنا. وشكراً لإنك دايماً واقفة في ضهري وبتدعميني في كل خطوة، حتى في الحاجات اللي يمكن مش عاجباكي أوي أو مش مقتنعة بيها بس بتعمليها وتوافقي عليها عشان تبسطيني وتراضيني. اسمك هناء وإنتِ فعلاً مخلية في حياتنا هناء وراحة بال وهدوء وفرفشة مفيش زيهم، والدنيا من غير صوتك وحركتك بجد ميسواش أي حاجة وبتكون كئيبة ومملة. أنا بحمد ربنا عليكي كل يوم لإنك أمي وصاحبتي وأقرب حد ليا رغم أي مسافة، ولإنك دايماً مخلية حياتي ليها طعم وروح بوجودك وبخفة دمك وطيبتك اللي مفيش زيها. ربنا يخليكِ ليا يا أحلى هنو في الدنيا ويطول في عمرك ويديكِ الصحة والعافية، وتفضلي دايماً معايا ومنورة دنيتي ومشاركااني كل تفاصيل وأسرار حياتي. ويارب دايماً أشوف ضحكتك منورة وشك وماتغيبش أبداً، وتفضلي دايماً مروقة عليا ومظبطاني ومصدر الفرحة والبهجة الأساسي في حياتي العمر كله. أنتِ بجد مش متخيلة مكالماتنا بالليل دي وكلامنا العادي عن يومنا بيمثلي إيه، بحس إن كل تعب اليوم والمواصلات والناس بيتمسح في ثانية بمجرد ما بنقعد ندردش ونتريق على المواقف اللي حصلت لنا. أنا دايماً بفتكر تفاصيل صغيرة يمكن أنتِ مش بتاخدي بالك منها، زي لما بفتكر لمتنا القديمة، أو لما بتصحي تسألي عليا في التليفون وأنا نازلة الصبح بدري وتدعيلي الدعوة اللي بتفتحلي كل الأبواب المقفولة. بجد مفيش أمان في الدنيا دي كلها زي أمان إن الكيان ده كله واقف في ضهري، وإن مهما عكيت أو غلطت في حياتي، هفضل أرجع ألاقيكي فاتحة لي دراعاتك ومستنياني من غير عتاب يضايقني. شكراً على كل مرة وثقتي فيا وفي دماغي، وعلى كل خطوة شجعتيني آخدها وأنا كنت خايفة ومهزوزة، أنتِ اللي كنتِ بتديني الثقة في نفسي لما كنت بفقدها تماماً وبحس إني مش قادرة أكمل. بحب أوي طريقتك في تهوين الأمور الكبيرة، لما بكون شايفة المشكلة مصيبة وتيجي أنتِ بكلمتين وبمنتهى الهدوء تخليني أكتشف إن الموضوع أبسط بكتير وميستاهلش كل حرقة الدم والزعل دي , بتهوني الدنيا على قلبي دايما. أنتِ بجد الشخص الوحيد اللي مفيش بيني وبينه أي حواجز أو كبرياء، يعني عادي جداً أكلمك وأنا بعيط أو أهزر معاكي بهزار أصحابي وأنتِ تتقبليني وتضحكي معايا من قلبك . وأنتِ فعلاً اللي مخلية في الأيام طاقة حب وفرفشة تخلينا قادرين نستحمل السحل والضغط، والبيت اللي بروحلك فيه من غير قفشاتك وتريقاتك على الأوضاع حوالينا ميبقاش ليه طعم ولا روح. بحب فيكي إنك بتفهمي مودي من لفتة، يعني لو كلمتيني ولقيتيني ساكتة بتعرفي علطول إذا كنت تعبانة ولا زعلانة من حاجة، وتلاقيكي من غير ما تضغطي عليا بتعملي أو بتقولي الحاجة اللي تروق دمي وتفرحني. ربنا يديم عليكي صحتك وراحة بالك، ويخليكي لينا يا سكرة حياتنا وضمان الأيام الحلوة، وتفضلي دايماً المرجعية الأولى والأخيرة ليا في كل حاجة بمر بيها في دنيتي. يارب دايماً أشوفك متهنية ومبسوطة في مكانك، ومفيش أي هم يدخل قلبك الأبيض ده، وتفضلي أحلى وأحن وأروع هنو في الكون كله، ومتحرمش أبداً من مكالماتنا ودلعك اللي ملوش مثيل